Esther a nanse dia 17 di yüni 1958 na Kòrsou i ta bini di un famia di 7 ruman; 5 muhé i 2 hòmber.

Semper Esther tabata gusta na partisipá na tur loke ta interesante den bida, pa siña algu for di dje. For di su 11 aña e tabata kanta alto/soprano den kor na Katedral di Pietermaai. Aparte di kanta e tabata un negoshante. Komo hòbi e ta gusta kushiná, sambuyá, hasi deporte i lesa.

Esther semper a dediká tempu na studia i esei a duna su frutanan awe. El a sigui diferente kurso di idioma bou di kua tambe spañó, papiamentu i ingles i tambe kurso di beyesa, medisina natural i muchu mas.

Na un edat hóben, pa ta eksakto ku 17 aña ( 1977) el a kuminsá traha komo lokutora i reportero/lesadó di notisia na Radio Kòrsou FM. Aki el a traha shete aña i a dirigí diferente transmishon  ku hopi éksito. Durante e añanan aki tambe e tabata skirbi un kolumna den un korant lokal ku no tei mas i ku tabata yama AWE.

Na aña 1984 el a kuminsá traha na Radio Hoyer komo lokutor i lesadó di notisia, loke el a hasi pa dos aña i mei.

Dia 7 di desèmber 1985 Esther a bai biba na St. Maarten. Djis despues el a kuminsá ei ku e programa radial BASILON, ku tabata toka e hit di piesanan Antiano pa tur pais den Caribe kaminda por a risibí e emisora. Esaki a dura te na aña 1992. Radio GBBC tabata e siguiente emisora ku el a forma parti di dje na St. Maarten, ku e programa BIBA SALÚ.

Durante e temporada aki tambe bibando na St. Maarten Esther tabata propietario di 2 salon di beyesa ESMAY UNISEX BEAUTY PARLOR i LA CACHE BEAUTY PARLOR.  Na aña 1993 el a regresá Kòrsou.

Na aña 1995 Esther a kuminsá ku estudio komoTerapista di masashi i ku el a tèrminá ku bon resultado. Esaki e ta praktiká te awe. Durante di e mesun aña el a kuminsá ku e produkshon na televishon di e programa di salú KOME PA BIBA, NO BIBA PA KOME.

Den programa aki el a duna demostrashon kon pa prepará kuminda na un manera salú a base vegetariano. Na aña 1996  el a bai Merka pa e estudio di Iridiologia, Nutrishon i Fitoterapia ku el a finalisá tambe ku éksito. di regreso na Korsow NATURE CARE BODY CLINIC a mira lus dia te ku aña 2000 ora ku el a bai Hulanda pa sigui su studio di ESPECIALISTA NATURISTA. Na mei 2008 Esther a logra e titulá aki tambe.

Na sèptèmber 2008 EMAYER HEALTH AND BODY a habri su portanan na Rotterdam, Ulanda, kaminda Esther ta bibando na e momentunan aki.

Vishon

Esther semper tabata buska pa konosé Hesus mas di aserka i siendo un persona ku no ta entregá fásil el a bin enkontr'é na aña 1993. El a tuma e desishon pa sirbié ku henter e kurason i pa medio di su grasia e ta hasi esei te awe. Di 2005 te 2007 Esther a presentá  un programa di gòspel na Radio Úniko na Ulanda 2 bes pa siman. Esaki tabata un programa di enkurashamentu spiritual pa hopi hende i debí na asina tantu petishon di parti di e oyentenan lo e kuminsá  ku su mes emisora riba Internèt bou di e nòmber Radio 7 77
Ke e pas di Dios por keda ku abo ku ta bishitándo e página aki ta mi orashon.

Esther Mayer